Europa ka përjetuar verën më të nxehtë gjatë vitit 2021, sipas një raporti të publikuar të premten nga shërbimi i ndryshimeve klimatike të Bashkimit Europian.

Më pak se tre javë pas publikimit të raportit të fundit të IPCC, duke paralajmëruar se temperatura e botës do të arrijë në 1.5ºC kritike mbi nivelet para-industriale brenda dy dekadave të ardhshme, shërbimi i ndryshimeve klimatike të BE-së ka publikuar gjetjen alarmante, transmeton portal arbresh.info

Sipas shkencëtarëve të BE-së, Europa përjetoi verën e saj më të nxehtë të regjistruar në vitin 2021, me temperatura 1°C më të larta se mesatarja 1991-2020.

Megjithëse viti 2021 nuk ishte viti më i nxehtë i regjistruar në Europë dhe në botë, vera u shënua me temperatura rekord, valë të forta të nxehtit dhe përmbytje të jashtëzakonshme.

Në Spanjën veriore temperaturat arritën në 47°C, një “rekord kombëtar”, dhe në Itali, me 48.8°C në Siçili, një “rekord europian”. “Në disa pjesë të Italisë, Greqisë dhe Turqisë, vala e të nxehtit zgjati dy deri në tre javë”, shtuan shkencëtarët.

Ngrohja e jashtëzakonshme e Detit Baltik,duket se ka qenë edhe shkaku i përmbytjeve në Gjermani dhe Belgjikë.

“Globalisht, 2021 ishte viti i gjashtë ose i shtatë më i ngrohtë që nga të paktën 1850”, thuhet në raport, duke shtuar se “shtatë vitet e fundit kanë qenë më të ngrohtat e regjistruara”.

Shkencëtarët kanë bërë thirrje urgjente për të kufizuar ngrohjen globale nën 1.5°C , në mënyrë që Toka të mbetet e banueshme./france24/arbresh.info/